純粹理性批判

《純粹理性批判》

作者	伊曼努爾·康德
語言	德文
原著書名	Critik der reinen Vernunft
題材	形而上學
出版地	普魯士王國
出版時間	1781年
頁數	856 (原裝版本)

《純粹理性批判》（德文：Critik der reinen Vernunft、英文：Critique of Pure Reason）係德國哲學家伊曼努爾·康德喺1781年出嘅一本哲學書，主要討論知識學。

序言

康德喺第二版嘅序言，做咗一個假設：「唔係知識一定要符合對象，而係個對象一定要符合認識主體，嘅先天認識形式」。呢一個新思維，就好似哥白尼由地心說變做日心說一樣，畀人話係哲學嘅「哥白尼革命」。所以，「人為自然立法」係康德哲學觀念入面，一個重要嘅命題。哲學嘅好多基本概念，甚至大家日常會用到嘅概念，都係嚟自「先天綜合性」嘅概念，例如「雨」、「天」、「生命」、「死亡」、「1+1=2」、同埋「靈魂」等等。正如康德所講，呢啲概念係「人為自然立法」嘅產物，亦就係人類嘅「先驗原則」所構成嘅基本理式——精神性結構。

先天綜合判斷

康德提出咗「先天綜合判斷」，而呢個概念係嚟自休謨嘅綜合命題同分析命題嘅區分。休謨認為：分析命題嘅謂語包含喺主語入面，例如「人都係會死嘅」，「死」包含喺「人」呢個概念入面，所以叫做“必然命題”，亦就係先天嘅；綜合命題嘅主語同謂語冇先天嘅邏輯關係，例如「一個人坐喺櫈上面」，休謨叫呢樣做“偶然命題”，亦就係後天嘅。康德對於又屬於先天，又屬於後天嘅概念，就提出「先天綜合判斷」。康德唔認為所有綜合命題都係後天嘅，而一啲先天嘅綜合命題就係「先天綜合判斷」。

康德對於分析-綜合區別嘅理解就係：

康德嘅三種命題

	分析判斷	綜合判斷
先天判斷	存在	存在
後天判斷	唔存在	存在

喺導言入面，康德提出咗全本書嘅總綱：純粹理性嘅總任務，就係要解決「先天綜合判斷」點樣有可能嘅問題。佢將先天綜合判斷分做咗三類：數學判斷、自然科學判斷、同形而上學判斷，組成咗下面嘅三個問題：

1. 純數點樣有可能出現？
2. 純自然科學點樣有可能出現？
3. 形而上學點樣有可能係科學？

康德將全書大致嘅分為咗五部份：

1. 先驗感性論
2. 先驗邏輯論
3. 先驗分析論
4. 先驗辯證論
5. 先驗方法論

五大論述

先驗感性論

根據「先驗感性論」(英文：Transcendental Aesthetic) 嘅睇法，任何人一天生就有嘅知識，都一定係嚟自直覺。呢種知識可以分做「空間」同「時間」兩大元素，就包含到哂所有自然界可以刺激到人嘅感官嘅現象。同一時間，空間同埋時間亦都係喺數學嘅先驗概念。

先驗邏輯論

根據「先驗邏輯論」(英文：Transcendental Logic) 嘅睇法，自然科學嘅知識，唔係淨係單靠直覺或者思維，而係要兩個一齊夾埋，先至可以發掘到新嘅學問。所以，一定需要有一個分開嘅範圍，嚟研究先驗嘅邏輯，同埋佢點樣可以喺經驗上面應用到。先驗邏輯最主要就係唔單至諗啲知識自己本身，而係探討知識同佢嘅對象之間嘅關係。

先驗分析論

根據「先驗分析論」(英文：Transcendental Analytic) 嘅睇法，人嘅理性判斷係可以分析出唔同嘅範疇。呢種分析可以分做概念 (英文：Concepts) 同埋原理 (英文：Principles)：喺概念分析入面，康德將知識性嘅判斷分咗做12個最基本嘅邏輯概念。喺原理分析入面，呢12個天生已經有嘅概念，經過時間去同人嘅經驗褦neng3埋一齊。

先驗辯證論

根據「先驗辯證論」(英文：Transcendental Dialectic) 嘅睇法，人嘅理性係充滿住一啲錯嘅概念，去嘗試解釋一啲人永遠都唔會能夠解構得到嘅嘢（例如神同靈魂）。仲有，康德認為理性係一定要超越個現象自己，先至可以攞到關於件嘢嘅知識。所以，康德認為形而上學只不過係一種先驗嘅幻想，所以唔係真正嘅科學。最後，因為每一件事都已經有至少一個前因，而康德就嘗試一路將啲原因推出去，睇下揾唔揾得出一個冇任何原因而發生嘅事件。

先驗方法論

根據「先驗方法論」 (英文：Transcendental Doctrine of Method) 嘅睇法，純理性需要有唔同嘅條件，先至能夠成為完整。雖然純理性嘅法規好好，但係佢嘅理論就冇任何規則。康德認為，純理性同純數嘅最大分別，就係純數可以設立唔同嘅先驗嘅公理，不過純理性就係完全依靠住人嘅經驗，所以只係後驗。康德認為，純理性唔應該超越佢本身嘅限制，嚟建立一種有關經驗嘅形而上學。

知識論嘅重點

對於知識論上面，康德提出咗幾個主要嘅重點。

知識嚟源

康德認為，知識係人類同時透過感官同理性而攞到嘅。所以，經驗對發掘知識係必須嘅。同時，產生知識亦需要有理性，而呢個能力就係靠天生嘅。康德同亞里士多德一樣，將呢種理性叫做「範疇」，認為如果冇咗呢啲範疇，人就冇辦法去感覺同埋知道呢個世界。

不過同時，康德亦睇到，人所接觸到嘅嘢，並唔係件事嘅真實「本體」。

時間同空間

對於康德嚟講，時間同空間係兩個天生好特殊嘅概念。佢喺書入面講到，冇人可以想象到住喺一個冇時間或者空間嘅世界，所以認為係容許人有經驗嘅基本需要。夾埋之前嘅概念，即係產生知識總共需要嘅係：時間、空間、同埋範疇。

另外，康德亦認為經驗係一定要係嚟自心靈以外。即係話，人可以用它嘅感官去理解身邊周圍嘅世界，但係就冇辦法去感覺同埋理解自己本身。

因果律

喺因果律方面，康德亦推翻咗休謨嘅睇法：休謨認為因果律並唔存在，而因果關係純粹係人習慣咗用呢個現象啫。即係話，我哋可以睇到兩個波喺度郁，但係就唔能夠解構得到究竟點解。

休謨認為，因為人冇辦法明白到因果關係本身，所以就都唔能夠證明到呢種關係存在。康德認同因果關係唔係嚟自人嘅經驗，不過就拒絕係完全唔可以知道，因為認為因果關係係人嘅理性嘅結果，係人嘅認知嘅規則。

宗教

喺宗教問題上面，康德承認無論係經驗定係理性，都冇辦法證明到上帝嘅存在。但係佢就認為，為咗維護道德嘅緣故，我哋一定要假設上帝同靈魂嘅存在。佢將呢啲信仰叫做「實踐嘅設准」，即係一個冇辦法證明到嘅假設，但係為咗實踐嘅緣故，就一定要假設成立。最後，康德維護咗人嘅尊嚴，強調「人係目嘅本身，而唔係用嘅手法」。