人

人，或人類，呢個名詞可以從生物、精神同文化各個層面來定義，或者係呢啲層面定義嘅結合。生物學上，人被分類為哺乳綱靈長目人科人屬智人種（學名為Homo sapiens Linnaeus），擁有高度發展嘅頭腦，係屬於用兩隻腳來行嘅動物。精神層面上，人被描述為能夠使用各種靈魂嘅概念，喺宗教入面呢啲靈魂被認為同神聖嘅力量或存在有關；而喺神話學入面，人嘅靈魂亦會被攞來同其他人型動物作對比。文化人類學上，人被定義為識得用語言、具有複雜嘅社會組織同科技發展，尤其係佢哋能夠建立團體同埋機構來達到互相支援同協助嘅目的。

生物學上人嘅學名係「智人」（拉丁文 homo 係「人」，sapiens 即「聰明嘅」），同黑猩猩、大猩猩、猩猩、長臂猿、合趾猿同屬人科嘅靈長目動物[1]。人類同其他靈長目動物嘅唔同在於人類直立嘅身體、高度發展嘅大腦，以及由高度發展嘅大腦而來嘅推理同埋語言能力。

行為學上來睇人類嘅特徵有：識得用語言，具有多種複雜嘅互助性社會組織，鍾意發展複雜嘅科技。呢啲行為學上嘅差異亦衍生出各文化唔同嘅信仰、傳說、儀式、價值觀、社會規範。